Ancje tal numar di Fevrâr, la cuistion centrâl tratade dal mensîl par furlan "la Patrie dal Friûl" e je chê de scuele. Lis fameis di marilenghe furlane, todescje e slovene a an timp ancjemò fint ai 9 di Març par decidi se sielzi pai siei fîs la possibilitât di insegnâur, tes scuelis statâls dal oblic, la marilenghe. De grande oportunitât culturâl e sociâl a cjacarin la professore Marisa Sestito, pressidente dai Cors par Tradutôrs e Interprits de Universitât furlane di Gurize, e la mestre Marie Valle de Scuele elementâr di Sant Stiefin di Buie.
L'editoriâl di Antoni Beline al fâs di jentrade a lis pagjinis dedicadis al dibatiment politic sul avignî dal "Moviment autonomistic furlan", dulà che "la Patrie" e presente un intarvent storic di Fausto Schiavi (1928-1972), conseîr regjonâl e pressident dal "Moviment Friûl" par 1700 dîs. Il speciâl di chest mês, al fronte la cuistion de sopression dal "Osservatori regjonâl de lenghe e de culture furlanis", de nassince de "Unitât operative complesse pe lenghe furlane e pes altris lenghis minoritariis" inmaneade de Provincie di Udin e dal progjet de ministrazion regjonâl di imbastî une "Direzion regjonâl sul plurilinguisim".
Sun chest numar, dulà che "la Patrie" e cjacare ancje di doi grancj furlans sicu David Marie Turoldo e Tarcisio Petracco, un servizi al è dedicât a Tischlbong/Tamau e ai siei vespui secolârs, taiâts par realizâ cun plui comut un grant fossâl.
Altris articui inmò a cjacarin de Convenzion europeane, di teatri e di musiche furlanis e dal cjadalan de "Patrie dal Friûl", fondade di Felix Marchi e di Josef Marchet ai 24 di Fevrâr dal 1946.

www.friul.net


< Torna alla pagina di marzo