Il tischlbongarisch sot Mont di Crôs (von Zercläre) Tamau / Tischlbong - Tal mês di mai stât il Consei provinciâl di Udin al à definît cuâi che a san i cumuns, su la tonde de leç 482/99, dulà che la leç istesse e vignarà metude in vôre. Si trate justeapont dal proviodiment di tutele des minorancis, che pe Furlanie e interesse lis comunitâts ladine-furlane, slovene e todescje. Di fat in ducj i cumuns de Provincie, fale Maran, Resie, Lusevare, Taipane, Stregne, Savogne, Pulfar, San Pieri, San Lenart, Grimac e Drencje, la lenghe e la culture furlane a saran tuteladis. Chê slovene e vignarà pupilade invezit, tai zà vûts iniment cumuns de Slavie, e inmò ta chei di Tarvis, di Malborghèt-Valbrune, di Dàtimis e Faedis. Chê todescje in fin, tai cumuns di Tarvis e Malborghèt-Valbrune (achi si tutelin tre lenghis: furlan, sloven e todesc n.d.r.), di Sauris e di Paluce. Tal cumun dal Cjanâl di San Pieri dutcâs la tutele de lenghe todescje e interesse nome la frazion di Tamau logade sot Mont di Crôs. Propite di Tamau / Tischlbong a rivin lis novitâs plui interessantis sul cont dal impegn par recupera la viere identitât di divignince todescje. Par esempli zà fa cualchi mês al è jessût il cuart “Tischlbongara Piachlan / Cuadêr di Culture Tamauese", publicât dal Institût dl Culture Tamauese in tune cul circul culturâl “G. Unfer”, e curât par chel che s’inten la redazion di Mauro Unfer. Un Cuadêr come simpri cetant interessant. Si vierç contant la viertidure di une gnove vie su la parêt di cret dai Ganzschpiz, tal mês di setembar dai 1997, de bande di Erwin Maier e di Walter Nones. Al ven daûr larticul, “Lis Tieris coletivis in cumun di Paluce fra passât e presint" di Stiefin Barbacêt ch’al inlustre l'argument des propietâs in cumunion come bens di ûs civic o come comunitât familiâr in mont. Laure van Ganz e propon invezit il prin contribût, par tischlbongarisch, dal Cuadêr cul titul “Glaub unt ganodn/Fede e meracui’ dulà che si cjate contade la devozion dai fedêi de alte Val de Bût viers S. Margarite e S. Valantin a Curçuvint, S. Antoni a Trep, S. Zuan e S. Luzie a Tamau. Il "Tischlbongara Piachllan” al va dilunc cun tun contribût di Zuan Ebner van Elmar, par plusôrs agns majorent de gjave di marmul di Tamau. Culi si conte cemût che si sgjavave, tajave e lavarave il marmul. “Gjavis di marmul a Tamau” al è inricjît di plusôrs dissens, fats dal istes autôr, che a permetin di capî miôr ce che si va indenant a contâ. “La strade romane di Mont di Crôs Cjargnel" al è il titul dal articul de dotore Mirte Faleschini, studiôse di topografie antighe. Mentri “Roasnckronz" , il piligrinàç che i tamauês a fâsin la prime domenie di utubar a Kötschach, te daprûf Gailtal, al è l'argument displeât di Christian Lederer. L'autôr carintian al conte la vicende dal altâr regalât dai tamauês a la Plêf di Marienkirche, e cemût che scomençà l'innomine di Kötschach come lûc di cult dediât a Marie. Âtris contribûts a son di Peppino Matiz van Messio ("Um holz” e "Da primpinella"), Francesca Cattarin (Tamau e la sô scuele das origjines al 1876). Laura Plozner van Ganz (“A marçhât di ViIe/Dar moarcht va Vila"), e Manuela Quaglia ("A trei pas di distance"). Un rilêf particalâ lu merte in fin il contribùt di Mauro Unfer: “O vìn scugnût scjampâ tes cpsis forestis e cetantis palotulis a rivavin sui cuvierts des cjasis... “dulà che, partìnt di une viere letare che -conte la vite, la profugance e i efiets dai bombardaments a Tamau dilunc la Vuere Grande, a san stadis ricoltis testemoneancis a vôs e par scrit di chei tragic moment storic. La ricercje si zove inmò di vieris fotografiis, mai denant trat publicadis, che a documentin i efiets disastrôs dal batibui dai canons. Smire di chest lavôr - nus semee di podê interpretâ - e je chê di predelâ e saboâ i studis, inmò pôc numarôs, su lis condizions di vite dai tamauês dilunc la prime vuere mondiâl. Condizions tragichis, di miserie, di pôre, di disperazion, di aviliment e rabie, pai suspiets che i majorents militârs italians a vevin tai rivuarts di cheste int tibiade, che veve "la grande colpe” di doprâ une fevelade che semeave masse a chê dal nim todesc. La int di Tamau e varès meretât dute une medae, parcè che je stade pardabon eroiche, e invezit ‘e à vût nome predicjis retorichis che inmô in dì di vuê si va dilunc a proponi… magari cussì no! Ladins dal Friûl, luj 2001 < Torna alla pagina di luglio