Tamau - Cleules. Ricuart di un preidi e di un muini (Renzo Balzan) Cleules / Tamau - Lis comunitats di Tamau e di Cleules a àn di resìnt paidît une pierdite cetant grande: a son muarts il plevan pre Attilio Balbusso e il muini Ilario Bellina. Ai 28 di fevrâr il Signôr al à clamât, par siervîlu te sô Cjase, Ilario Bellina. Fî di Matteo (Teu il muini) e di Puntel Teresa, al jere nassût in Som da Vile (Cleules) ai 12 di novembar 1926. In famê al jere stât educât te fede e secont i sans principis morâi, patrimoni de tradizion dai nestri pais cjargnêi. Fintremai di frut al à scomençât a judâ so pari muini tes vòris de glesie, une tradizion di famee cheste, parvie che ancje il nôno Pauli al jere stât muini. Daspò une vite di lavôr come emigrant, tornât tal paîs di nassince al veve cjapât su l’impegn di muini a timp plen. Donatôr di sanc, bon di caratar e benvolût di ducj, al divente un personaç scuasit "instituzionàl”, sore il dut cuanche al lave a lei lis sacris scrituris dilunc la Messe, cun chel so intono cadençât e solen. Come che a jerin solens e savìnts i conseis e i judizis che al dave sui acjadiments dal pais, e ancje fûr de propie comunitât. La testemoneance dal tant che al jere benvulût de bande dai paesans, oltri che de int dai centris dulintôr, si le à vude dilunc il timp ch'al è stât ricoverât tal ospedâl di Tumieç. No passave zornade, justeapont, che nemarôs paesans e amis a làssin a cjatâlu. E po de tante int che à cjapât part al so funerâl, tune grise e frede zornade sul scomençâ di març. Une manifestazion di afiet e di stime che à comovût chei di famee. Cetant coròt ‘e à puartât la notizie de muart, ai 26 di març stât, di pre Attilio Balbusso, plevan di Tamau dal 1978 e ministradôr di Cleules. Pre Attlio, ch’al veve 71 agns, al jere nassût a Cujan di Puçui ai 7 di fevrâr dal 1930. Predi invezit al jere stât ordenât tal 1954. Predi vêr, cu la lungje tonie nere simpri aduès e i scarpons tai pis dut il timp da l’an, al jere l’esempli plui sclet dal plevan di montagne. Oltri che a Tamau e a Cleules, al jere stât parchel a funzionâ ancje a Codromaz e a Cianeule, te Slavie Furlane. Denant di cheste figure autentiche, che a testemoneave, e 'e meteve in vôre ogni dì tra la sô int il Vanzeli, ducj i discors teologics e antropologics dai predis di Curie e di palaç a podevin lâ a platâsi. E lis lauts di circostance che o vin sintùt intant dal so funerâl a Tamau, tune glesie dal Crist incolme di int, a jerin come la musiche di un spartît degn di un cap d’opare, ma sunade di sunadôrs di mieze vigogne. Pre Attilio al à lassât un grant vueit in dut il Cjanâl de Bût, come om e come predi, e ogni peraule dite in plui e je dome retoriche. Di Attilio Balbusso (predi) e di Ilario Bellina (muini) nus reste un ricuart ch'l è par cierts aspiets un testament e un avîs: restâ salts te fede ereditade dai nestris vons, tigni cont lis tradizions, jessi disponibii a judâ cui ch'l à dibisugne, compuartâsi in maniere corete tai rapuarts umans. A semearessin cjossis fûr di mode, antigae cence plui nissun valôr. Ma cussi dabon nol è parcè ce, timp o tart, lis cjossis e i valtôrs che a son significants a tomaràn a cuistâ la preseositât e l’impuartance che cumô o pensin che a sedin lâts pierdûts. Voce della Montagna, luglio 2001. < Torna alla pagina di luglio