Urcje vie, contadin! (Marco Tempo) Ignorance e aviditât: cussì malghis e passons a son simpri plui bandonâts. I câs des monts Claupa (Lauc) e Pal Piçul (Paluce) Escomiade de tiere l’agricolture de mont. Cussì si poderès dî, in curt, de storie dal apalt di malghe Claupa tal comun di Lauc. In chest câs, compagn di altris inmò, a an vinçût lis logjichis dal legalisim o di altris interès plui o mancul clârs. La malghe Claupa, antîc “ûs civic”, e je sot dal Arvenis, a mil 600 metris intune valute jenfri la mont Tribil e la Claupa. Intes lozis a ’nd è puest par 30 vacjis e ancjetantis pioris. Si rive lassù o di Lenzon, par sore Davâr, o de val di Lauc. Proprit te val di Lauc e je a stâ la siore Alba Gressani ch’e à un’aziende agricule, une des pocjis restadis te valade. Ma cheste credenziâl no je bastade par vê in afit la malghe. Claupa e je intun lûc cetant interesant par un svilup agrituristic: provait a pensâ ae Carintie o al Tirol di misdì; un ambient compagn si cjate ancje sot dal Arvenis. Magari cussì no, in Cjargne e mancje la mentalitât e ancje la situazion juridiche-patrimoniâl par proponi un svilup come chel Sudtirolês. Cussì za fa 2 agn la malghe e je lade in afit a un arlevadôr dal Venit. Ma cualchidun si è inecuart che nemâi in malghe no ’nd jerin: a disin che si use a fâ cussì par cuvierzi “pascjei” cu lis cuotis dal lat. Si fevele ancje di subafits ch’a son improibîts de leç... In dut câs l’apalt al è revocât. An passât, in deroghe des normis ch’a previodin une gare pal apalt, la malghe e ven dade in afit ae siore Gressani. Chest an, però, il Comun al torne a fâ una “gare al rialç”, impen di fâle a “cjanul ecuo”, cun strazion tal câs di plui concorints, cemût ch’e prevîot la leç sui contrats agricui, pes propietâts di ûs civic. Si partìs di 1 milion e 900 mil francs ad an par 5 agns. La siore Gressani e concôr, ma al vinç un arlevadôr de Basse, ch’al ufrìs scuasit 5 milions. Sichè duncje un apalt fûr di leç, come ch’al à confermât ancje il Tribunâl ministratîf dal Friûl-V. J. tal 2000. Inte sentence si dîs che l’interès di vuadagnâ de bande di une comunitât ch’e rinuncie a doprâ diretementri un teren al è mancul impuartant dal interès di svilupâ l’agriculture. In curt, un teren di ûs civic si à di fitâlu a “cjanul ecuo”. Alore, chel di Claupa al pararès un apalt inlegâl. Il sindic di Lauc, Olivo Dionisio, si è difindût disint: «O vin scugnût fâ cussì. O riscjavin di procurâ un dan erariâl». Clâr che Dionisio nol cognòs ben cheste leç e come lui ancje altris sindics de mont. Difat, al è pôc che ancje il Comun di Paluce al à fat une “gare al rialç” e la malghe di Pal Piçul, monteade di agns di un arlevadôr di Sece, e je lade a un grant arlevadôr carintian che di là di Mont di Crôs al à albiercs e ristorants. Dome che par 4 carantans in plui. Ma cualchi Comun cjargnel al à fat piês ancjemò. Chel di Paulâr al à fitât cence bant, ma cuntun contrat privât. In realtât, se une comunitât e vûl e rive a cjatâ la fate di judâ i contadins ch’a lavorin in alte cuote, par un esempli cjapant in afit i terens chenti di une malghe par doprâ i derits di prelazion... Par cumò la pôre de siore Gressani e je chê di tornâ a viodi la stesse situazion di 2 agn indaûr. Cui ch’al piert, in dut chest pastroç, e je la int di mont ch’e cîr di lavorâ in alte cuote, «plui che pai bêçs, par mantignî il teritori a pro de comunitât», come ch’e à scrit intune letare publicade sui zornâi Luzie Miu, arlevadore di mont. Insumis a deventin une vore concretis lis peraulis dal vecjo arcivescul di Udin, bons. Alfredo Battisti, cuant che si prontave la convigne diocesane su la mont, tal mês di Novembar: «Si scuen tornâ la tiere de mont a la sô int». Ma se chei ch’a gjavin la tiere a la int de mont a son ancje chei int de mont? La Patrie dal Friûl < Torna alla pagina di agosto