23 dicembar 2000: Is boarn ausgeim dar numar 36 van Asou Geats unt da cholendar “Oarbatn unt oarbatzlait” virn 2001
24 dicembar: Um da mitanocht viil lait sent zar meis gongan unt hott schian vain cniim.
25 dicembar: Af Telealtobut is boarn gazak da leista telezaiting as in ondarn too van Bainachtn aa is boarn cauk van doarflait unt van ausbonara.
28 dicembar: Cnochz, in sool van cinema, dar Massimo, dar Francesco van Galo, da Catia unt da Simona van Paloni hont teatro gamocht.
29 dicembar: Cnochz, in sool van cinema, dar Gianni van Krepp unt saina chamarotn hont gamocht seachn aneitlan piltar var raas asa in Marok hont gamocht.
1 sghenaar 2001: Da chindar geant niamar bincn in da haisar abia a mool.
6 sghenaar: Hojar sent laai zbaa gabeisn da Ckiniga as in anian haus sent gongan is zanchl singan, baar gabeisn dar Ottaviano van Beec unt da Danila van Sepp as van 1982 senant.
7 sghenaar: Chreink in gonzn too abia in herbast.
9 sghenaar: A schia too suna unt cnochz um naina, men niit eibli baar gabeisn hiatmar gameachat seachn in monaschain varvinstar. Doos beart bidar voar cheman in a zbaa joar. Houfmar as dar himbl chloar iis vir da see mool.
13 sghenaar: In aan mischckibl van doarf honza pacheman an vocka as muast sain vareckt noor honza gadenckt in cherach zan sghmaisnin.
14 sghenaar: Virn dritn joar, a cock lait va Triescht sent aufn gongan pan Jegarastlan da meis mochn zan gadenckn da zbaa jungan schtaigara as var bont oar sent pfoln unt ctoarm in 11 sghenaar van 1998. In gonzn too hott a ckoltar luft gaplosn.
15 sghenaar: Schia beitar ovar viil, viil ckolt.
16 unt 17 sghenaar: Zbaa toga schia beitar peisar abia in sumar ovar ckolt mear as ganua.
18 sghenaar: Hott polda in gonzn too schian vain cniim, inols sent pfoln 15 zm. sghneab.
20 sghenaar: Um holbazbelva cnochz hozz onckeip vain zan sghnaim.
22 sghenaar: Indarvria hozz vain cniim ovar noor hozz cbint aufcheart
30 sghenaar: In gonzn too hott dar bint gaplosn unt af Sudri is voiar gabeisn in da bisn.
1 fevraar: Ckolt unt bint. Unsar cock tonz chindar sent in Sicilia gongan vir aneitlan toga.
2 fevraar: Cnochz viil lait sent zar meis gongan da gabichnan cherzn neman.
3 fevraar: Nochmitoo um viara, avn Kalin Chouvl a moon va Schunvelt is pfoln unt hott in chnia gaprouchn. Cnochz viil lait sent zar meis gongan in hols baichn.
5 fevraar: Eibli unt indarvria hozz vain, vain chreink.
6 fevraar: Pein ruka bearn sent schuan aneitlan toga as unsar gaistligar dahama plaip unt mocht chana meis.
10 fevraar: In oltn haus af Palucc schtearp dar Stefano van Beec as hott ckoot 69 joar.
11 fevraar: Schia beitar in gonzn too, goar in sumar is niit asou schian.
12 fevraar: Um andlava indarvria var bont is a groasar sghlak oar gongan.
13 fevraar: Af Lusnburk schtearp dar Arnaldo van Jega as is gabeisn van 1932. Unsar gaistligar is in schpitool af Glamaun gongan baldar chronch is min hearza unt hott is bosar in da lungl.
14 fevraar: A hizza van taivl in gonzn too. Um andlava indarvria, in himbl oubar Curcuvint unt Sudri sent virpaai zbaa groasa luftchigl, andar roat unt andar geal.
15 fevraar: Bidar a schia too suna. Indarvria, da seen van beiga, oubara mauar aufn ibarn Pearck aichn honza da pferlichn schtana oar gamocht ruccn unt untarn beig oachn cmisn.
17 fevraar: Um holba zbelva cnochz, avn beig, untarn haus van Marzo, andar va Schunvelt hott untargatriim mittar maschiin an schian reach.
24 fevraar: In Scholeit a schia reach is vareckt in ockar van Gianni van Krepp. Kein cnochz hozz onckeipt a pisl zan sghnudarn.
25 fevraar: Avn plozz van Don Attilio, um andlava indarvria, hott a vremdar gaistligar meis gamocht. Darnooch is boarn gabickn dar noja ambulatori as da navouz var Teresiin van Jega hear hont chrichtat avn nomat va soiadar muatar da Ennia as voar zbaa joar is ctoarm.
27 fevraar: Aneitlan chindar sent in maschkara gongan aa men ckolt is gabeisn unt hott a pisl cnudart.
28 fevraar: In gonzn too hozz vain cniim, inols sent zeichn zanteisims sghneab pfoln.
1 merz: Cnochz schtearp dar Luccio van Cjapitani as is gabeisn van 1927.
2 merz: Par unchircha hott onckeip da Via Krucis unt hozza gamocht dar Don Ivo va Penck. Lait sent niit viil gabeisn pein da ckeltn.
3 merz: Af Bellun, in haus var toachtar, schtearp da Paula van Todeschk as is gabeisn van 1912
5 merz: Af Pleckn is dar Gresl ctoarm.
8 merz: Is aus boarn geim dar viarta numar van Tischlbongara Piachlan as dar Mauro van Cjapitani ainviart
9 merz: Par Unchircha hott Via Krucis gamocht dar Don Tarcisio va Palucc
12 merz: Viil chreink in gonzn too unt dumadum afta pearga hozz oar cniim
16 merz: Dar Don Renzo va Curcuvint hott Via Krucis gamocht
18 merz: Cnochz par Soga honza untar gatriim a reachl
19 merz: Eibli in gonzn too. Af Palucc schtearp dar Norberto Di Centa as is gabeisn van 1923.
20 merz: Ma is cheman zan beisn asa oum par kantoniera hont pacheman anaviarzk bambalan asa beck hont pfiart. A chlanara bomba is untarn schteig afta Schiit.
21 merz: Hott onckeipt dar longast pan ergastn beitar, eibli unt vain chreink in gonzn too.
24 merz: Da nocht par Soga honza nidar cousn aneitlan reachn. Da uur homar a schtunt virchn coum.
25 merz: Eibli, nochmitoo hozz schiacha chreink unt kein cnochz hozz cauart.
26 merz: In Schpitool af Bain schtearp unsar Gaistligar, dar Don Attilio Balbusso as is gabeisn van 1930. Pagroom honzin av unsarn vraitouf.


< Torna agli articoli del n. 37