Afta zaiting van avoscht van 1998 homar ols oar criim van chraiz as afta Conta iis, unt hiaz reimar van anondarn chraiz as in da Braida oum iis, in seen Groom entarn haus van Felice. Dar earschta asuns eipas darzeilt darviir is dar Onelio van Garibaldi asi hoon ooganoman voar vinf joar: “In dritn mai van 1958 sent vinf korrieras chindar var schual cheman min learara schaun da Unchircha. Um mitoo honza dein chindar glosn lafn in da bisn unt eipas eisn. A diarli is avn peindlan van Titarinka aufn gongan, noor isa clipft unt oar gabolgn vir sezz metros in Groom van Karnatlan bosa an schtraach in da sghlofa hott darbischt unt is maus toat pliim. Sii hott ckoot draizachn joar. Dar Diretoor var schual is aufar gloufn panuns da bicikleta laichn asar in doarf hott gameik gianan telefoniarn. Nitt in eipas drinn zan cheman honza a maschiin ganoman unt hont dos diarli oachn pfiart in sain doarf bosa is pliim. Is joar darnooch, sai votar hott gamocht a chraiz mochn van Magri va Palucc asar zuachn pan groom hott aufcteilt. Ear iis vir longa zait cheman da roasn nidar tuanan unt miar var Braida, zan Oldarhaillin tromar aufn unt zintn oon a cherza. Durch deen umglick honza darnooch in miatar unt in vatar aa zua glosn nooch zan gianan in chindar mensa a raas hont gamocht, darvoar is niit asou gabeisn”.
Van seen schiachn too, olabaila voar vinf joar, hottmar eipas maina nona Elsa aa darzeilt: “In seen too pini par Ian gabeisn unt mens is ceachn honza dos diarli oar gatroon, aichn in haus, drauf avn tiisch unt pluaz nocknti oogazouchn. Is a schia mencarli gabeisn, krepat, is roata hoar gazopft unt laapschprichlt in zicht. Hont bool gamant asa bidar heardoo taat cheman ovar in schtraach hozza in da sghlofa ckoot darbischt unt is maus toat pliim. A schiacha cicht is voar cheman deen lait asa noor van haus ausar hont gatroon, drauf av aa maschiin unt beck pfiart. Darnooch ismar cheman zan beisn asa in Diretoor hont ckoot beck cprizzt var seen schual. Dar oarma moon hott chana schult ckoot, oarman lait!”
Dos diarli, bimar meik leisnan avn chraiz, hott Clara D’Amato chasn, sii iis va Pordenon gabeisn, toachtar van aan farmacist unt saina lait honzi ckoot varlosn.
Bi da Nuta van Koka aa hott darzeilt, men is joar is pfoln, sai votar is olabaila cheman min roasn unt a joar sent saina chamarotn var schual aa aufar, darnooch hottmar niamp mear zeachn.
Hiaz beismar bidar eipas darviir van anondarn chraiz, a schiacha cicht as is ceachn in unsarn doarf, a schia too vir da seen chindar unt learara as hott pfertigat in da ergasta moniar.


< Torna agli articoli del n. 37